Dymuno'n Dda i Dylan Aubrey

Braf iawn gweld Dylan yn ôl wrth ei waith ar ôl y ddamwain gafodd o ym mis Medi – anffawd pur gas i’w law. Fe wyddom fod Dylan o ddydd i ddydd yn ei waith yn gorfod trin peiriannau, a nifer ohonynt yn rhai peryglus, fel gall peiriannau fod. Ac yntau wedi dychwelyd i weithio ym mis Tachwedd roedd Dylan yn cydnabod pa mor bwysig ydy gofal wrth drin peiriannau a’r angen i wisgo dillad addas wrth drin peiriannau, megis lli gadwyn.

Gweithio mewn gerddi pobl mae Dylan, fel gwyr y rhai sy’n ei adnabod – yn torri lawntiau, clirio drain a mieri, tocio a thorri coed, a torri a thacluso gwrychoedd. Mae pobl o fewn yr ardal a thu hwnt yn wir, yn gwybod yn dda amdano. Elfen o’i waith sydd wedi datblygu’n ddiweddar yw cerflunio coed gan ddefnyddio llifiau cadwyn ac o bryd i’w gilydd gellir gweld arddangosfa o’i waith ar ochr y ffordd yng Nglan y Wern, Talsarnau. Yno gellir gweld amrywiaeth o dylluanod, cymeriadau hynafol, coed Nadolig, goleudy gyda grisiau’n arwain dros greigiau a llu o bethau diddorol eraill.

Braf cael dweud fod Dylan yn ôl wrth ei waith a’n bod ni o fewn yr ardal yn dymuno’n dda iddo i’r dyfodol.

(Mwy o luniau Dylan yn yr adran Hysbysiadau Teuluol.)

Cyngerdd Mis Hydref 2014

Cynhaliwyd Cyngerdd yr Hydref eleni ar Hydref 24ain 2014 a braf iawn oedd gweld y neuadd yn llawn. Cynulleidfa a wyddai mai Gwynfor Williams Gwrach Ynys roddodd y cwch yn y dwr wrth wahodd aelodau o Barti'r Goedlan a Trio Canig pan ddaethant ar draws y naill a'r llall yn Iwerddon o bob man. Gwyddom fel y byddai Gwynfor wrth ei fodd yn dilyn y gemau rygbi rhyngwladol ac ar ol y gemau, ennill neu golli, byddai wrth ei fodd yn morio canu fel rhan o'r dathliadau. Llynedd, tra yn Iwerddon, mewn noson a blas arbennig ar y canu a'r ginis, gwahoddodd Gwynfor y criw i ddod i Dalsarnau i gynnal noson. A dyna fel y bu.

Ond gwyddom ers hynny, wrth gwrs inni i gyd yn ein gwahanol ffyrdd brofi'r chwithdod a'r brofedigaeth o golli Gwynfor. Teimlwyd er ei golli, y byddai Gwynfor am inni fynd ymlaen a'r trefniadau ac y byddai am i bawb ohonom gael hwyl a mwynhau'r noson.

Ac felly bu. Fe gafwyd hwyl - jocs dirifedi gan Tudur Evans arweinydd y noson ac aelod o Barti'r Goedlan o ardal Brithdir. Bu hefyd yn canu ynghyd a'i frawd Bedwyr a'i ferch Arwen. Fe gawsom unawdau grymus gan y ddau ohonynt ac fe gawsom ein cyfareddu gan lais hyfryd Arwen, a'i dewis o ganeuon yn cyffwrdd pob un ohonom. Cafwyd eitemau caboledig gan y triawd o Fon - Trio Canig a'u lleisiau mewn harmoni tyn ac yn gweddu i'w gilydd. Cafwyd sawl datganiad roddodd bleser pur i'r gynulleidfa. Gwerth nodi hefyd y ddau gyfeilydd gan i'r datganwyr a'r gynulleidfa werthfawrogi eu chwarae.

Croesawyd y gynulleidfa a chyflwynwyd yr artistiaid gan Dewi Tudur ac ef hefyd ddiolchodd i bawb a fu'n rhan o'r trefnu mewn fordd ddyheug ac addas i'r amgylchiadau

Cafwyd gwybod gan y trysorydd, Margaret Roberts i'r noson wneud elw o £880 sydd yn swm anrhydeddus er hybu gweithgarwch o fewn y neuadd. Diolch cynnes iawn i bawb ddaeth i gefnogi.

Llwyddiant Cor Cana Mi Gei

Llongyfarchiadau i Cor Cana Mi Gei

Llongyfarchiadau enfawr i'r côr merched lleol, Cana Mi Gei ar eu llwyddiant yn eu cystadleuaeth gyntaf erioed. Cynhaliwyd Gwyl Gerdd flynyddol yn Ysgol King's, Caer, ers sawl blwyddyn bellach, a phenderfynodd Ann Jones, yr arweinydd, y byddai'r côr yn cystadlu yn adran y corau merched ar ddydd Sadwrn 17eg Mai 2014.

Y beirniad oedd Yr Athro David Hoult, ac fe benderfynodd mai Cana Mi Gei oedd yn haeddu'r wobr gyntaf. Y wobr oedd Cwpan Stamford.  Diolch i Ann ac i gyfeilydd y côr, Elin Williams, am eu holl waith.